Golo ar romant klok bet troet gant Yeun Ar Gow. · 2020. 11. 20. · Brudet bras eo ar romant...
Transcript of Golo ar romant klok bet troet gant Yeun Ar Gow. · 2020. 11. 20. · Brudet bras eo ar romant...
-
Golo ar romant klok bet troet gant Yeun Ar Gow.
-
Brudet bras eo ar romant Treasure Island (« Enez an Teñzor ») er bed a-bezh.
Troet eo bet e nouspet yezh hag e brezhoneg eo anavezet mat troidigezh Yeun
Ar Gow.
Skrivet e oa bet an istor gant ar skrivagner skosat Robert Louis Stevenson evit
ar re yaouank. Ganet e oa bet hemañ e 1850 e Din-Edin (Edimbourg) ha lodenn
diwezhañ e vuhez a dremenas er Mor Habask, etre Amerika hag Azia, e-lec’h
ma oa tommoc’h ha yac’husoc’h an amzer evitañ. Mervel a reas yaouank a-
walc’h c’hoazh e 1894, en enezenn Samoa.
Kontañ a ra R.L. Stevenson troioù-kaer martoloded o klask un teñzor bet kuzhet
gant forbaned en un enezenn distro. Ne vint ket o-unan avat, reuz, kann hag ur
bern darvoudoù a vo a-hed an istor...
Er pajennoù da-heul e vo kavet un diverradenn vrezhonek eus ar romant brudet,
bet savet gant Herve Konan.
Herve Konan e oa anv skrivagner (anv-pluenn) Armañs ar C'halvez, beleg ha
kelenner e Sant-Jozef e Lannuon. E penn "Wanig ha Wenig" e oa, ur gelaouenn
evit ar vugale, hag ivez e penn “Breuriezh Sant-Erwan" ur gevredigezh evit ar
vrezhonegerien yaouank. Ginidik e oa eus Kemper Gwezheneg ha marvet eo e
Lannuon. (s.o. geriadur ar skrivagnerien, Lukian Raoul, Al Liamm 1992)
-
PENNAD KENTAÑ
AR C’HABITEN KOZH
“Lavar din, kabiten !” eme ar c’hozh vartolod d’am zad en ur deurel tri pe bevar
fezh aour ouzh toull-dor an ostaleri anvet “An Admiral Benbow”. “C’hwi a lavaro
din pegoulz e vo bet dispignet ganin an arc’hant-se.”
Bez’ e oa un den bras, kreñv ha brun, gwisket gant ur porpant lous. Roud un
taol kontell a oa chomet war unan eus e zivjod. Hon ostaleri a blijas dezhañ dre
ma tarempredemp nebeut a dud. Reiñ a rae din, hag aliesoc’h ne rae ket, un
tammig arc’hant evit eveshaat ma teufe ur martolod bennak, dreist-holl unan
dezhañ ur c’har goad.
Ar c’habiten kozh a eve rom, a zisplege kontadennoù spontus hag a gane
kanaouennoù mor a-hed an deiz.
“Pemzek paotr war arc’h an den marv”
“Yo-ho-ho hag ur voutailhad rom !”
Setu an diskan a zeue gantañ an aliesañ.
Da gentañ e oa ur gounid evit an ostaleri. An amezeien a zeue d’evañ ha da
ganañ gantañ. Met chom a reas ganimp pa oa dispignet ar pevar fezh aour. Ne
baee ken netra evit e voued hag e lojeiz. Paour e oamp deuet da vezañ gantañ.
-
PENNAD DAOU
UR GENTEL VAT
Ma zad en doa aon rak ar c’habiten, hag evit lavaret ar wirionez, holl e vezemp
spontet gantañ. Ur gentel vat a zegemeras un deiz. An doktor Livesey a zeuas
da welout ma zad. A greiz-holl e krogas ar c’habiten gant e ziskan en ur skeiñ
war an daol evel kustum evit goulenn peoc’h. Holl e tavjont nemet an doktor, a
gendalc’has da gomz.
- Peoc’h du-hont ! eme ar c’habiten.
- Ouzhin e komzit, Aotroù ?
- Ya, eme ar c’habiten, en ur bec’hiñ1.
- Neuze, eme an Dr Livesey gant ur vouezh sioul, n’em eus nemet un dra da
lavarout deoc’h : ma kendalc’hit da evañ rom evel-se e vo hep dale un
hailhon nebeutoc’h.
Ar martolod kozh a savas leun a gounnar2, a zigoras e gontell hag a
c’hourdrouzas pegañ ganti an doktor ouzh ar voger.
“Lakait ar gontell-se en ho kodell diouzhtu, a lavaras an doktor hep aon, pe e
prometan deoc’h bezañ dic’houzouget gant an Asezoù3 kentañ.”
Souezhet e voemp holl o welout ar c’habiten o sentiñ.
“Ha bremañ, eme an Dr Livesey, e lavarin deoc’h ez on barner ha medisin war
un dro ha ma klevan ur c’hlemm diwar ho penn e viot argaset eus ar vro.”
Kement-se a sioulas ar c’habiten evit ur pennad. Hon ti a veze didrousoc’h. Hag
evel ma oa krog ma zad da fallaat un tammig bemdez hor boa, ma mamm ha
me, a-walc’h d’ober evit teurel re a evezh ouzh hon ostiz4 displijus.
1 Pec’hiñ : komz dizoare, diseven
2 leun a gounnar = drouk ennañ
3 Asezoù = bodadeg ar varnerien
4 ostiz = un den degemeret
-
PENNAD TRI
KI-DU
Un devezh a viz Genver e oa aet ar c’habiten evel kustum d’an aod gant e
deleskop dindan e vrec’h. E-keit ma oan oc’h aozañ e lein dezhañ e tigoras an
nor hag e teuas un den e-barzh : glas e oa, hag un neuz1 klañv warnañ. Kollet
en doa zoken daou viz eus e zorn kleiz.
Fellout a reas dezhañ ur werennad rom. Pa voe bet servijet e c’houlennas hag-
eñ e oa an dijuni evit e gamalad Bill. “N’anavezan ket ho kamalad Bill, emezon,
ar pred-mañ a zo evit “ar c’habiten”.
“Mat, emezañ, ma c’hamalad Bill a c’hell bezañ anvet ar c’habiten. Un troc’h
war e jod, lakaomp war an hini zehou ha bez’ eo ouzhpenn un den plijus, dreist-
holl pa vez mezv. Laouen-kenañ e vo Bill Kozh ouzh ma gwelout2!”
Dre an nor e selljomp hag e weljomp ar c’habiten o tistreiñ. Daoust ma oant
“mignoned” e seblante an estrañjour bezañ nec’het. Tennañ a reas e gontell ha
chom en e sav a-dreñv an nor digor.
Ar c’habiten a zeuas tre, a serras an nor hag a azezas.
“Bill,” eme an den en ur glask ober ur vouezh gros ha lorc’hus.
Ar c’habiten a droas hag e sellas outañ. Glas e oa aet betek e fri ha heñvel e
oa ouzh un den hag a welfe un tasmant3 pe un diaoul.
“Deus, Bill ! Ma anavezout a rez sur-mat !” a lavaras an estrañjour.
“Ki-Du !” a hopas ar c’habiten. “Eñ e-unan, eme egile, Ki-Du deuet da welout e
gamalad Bill e ti an Admiral Benbow”.
1 un neuz klañv = seblantout a rae bezañ klañv
2 d’am gwelout = o welout ac’hanon
3 un tasmant = skeud un den marv
-
PENNAD PEVAR
TROUZ HA BEC’H ETRE MIGNONED
Petra a glaske Ki-Du ? Ne ouezis ket neuze rak argaset e voen ganto eus ar
sal. Ne glevis da gentañ nemet komzoù a vouezh izel, met hep dale komzoù
leun a gounnar distaget a vouezh uhel.
"Echu, eme ar c'habiten. Ha ma komzer eus krougañ, ra vimp holl krouget."
Ki-Du a redas er-maez eus an ti gant ar gwad o tiverañ1 eus e skoaz. Buan e
tec'has kuit.
"Rom, Jim," eme ar c'habiten, en ur lakaat e zorn ouzh ar voger evit chom en e
sav. "Rom ! Ret eo din tec'hout. Rom !"
Met a-raok ma oan distro gant ur werennad e oa gourvezet2 ar c'habiten war al
leur. Dre chañs e oa deuet an Doktor da welout ma zad. Stagañ a reas da
ziwadañ ar martolod kozh.
"Pelec'h emañ Ki-Du ? ", a hopas ar c'habiten pa zigoras e zaoulagad.
"N'eus Ki-Du ebet amañ, eme an doktor. Taolit evezh ouzh ma c'homzoù : diwar
ur werennad rom ne varvoc’h ket. Met c'hwi a evo c'hoazh meur a hini, ha c'hwi
a varvo a-benn fin. Klevout a rit ? Ha buan d'ar gwele ! "
"Ha pegeit en deus gourc'hemennet an Aotrou-se din chom em gwele ? " a
c'houlennas ar c'habiten, pa oa aet kuit an doktor. "Ur sizhunvezh, da vihanañ",
emezon.
"Ur sizhunvezh !, a hopas, n'hellan ket chom keit-se. A-raok fin ar sizhun o devo
lakaet ar merk du warnon". Klask a reas sevel, met diouzhtu e kouezhas war e
gein.
1. o tiverañ = o ruilhañ
2 gourvezet = ledet, astennet
-
PENNAD PEMP
AN DEN DALL
"Ki-Du a zo fall a-walc'h, emezañ, met tud falloc'h c'hoazh a zo war e lerc'h.
Emaint o klask laerezh ma c'houfr-martolod. Ma lakaont ar merk du warnon, kit
da lavarout d'an Doktor dont amañ gant an dud a lezenn. Me e oa kentañ ofiser
ar c'habiten Flint, ha me hepken a oar pelec'h e kuzhas e deñzor. Met arabat
mont da lavarout d'an dud a lezenn, Jim, nemet e welfes Ki-Du, pe ur martolod
dezhañ ur c'har hepken, pe c'hoazh ar merk du lakaet warnon. Un doare urzh
eo ar merk du. Digor mat da zaoulagad, Jim, hag e roin dit un hanter eus an
teñzor !"
An nozvezh-se e varvas ma faour-kaezh tad. Lezet e voe ar c'habiten d'ober ar
pezh a gare, da evañ rom adalek ma c'hellas sevel diwar e wele.
Deiz war-lerc'h interamant ma zad e welis un den o tiskenn gant an hent. Dall e
seblante bezañ peogwir e skoe war an douar gant e vazh hag e oa hanter-
guzhet e zaoulagad.
"Piv a lavaro din pelec'h emaon ? ", a c'houlennas war un ton kanus. Biskoazh
em buhez n'em boa gwelet un dremm ken spontus.
"En ostaleri an Admiral Benbow, ma den mat, emezon.
— Roit din ho torn, den yaouank, ha diskouezit din an hent da vont e-barzh".
Stardañ a reas war ma dorn gant bizied dir.
"Ha bremañ kas ac'hanon betek ar c'habiten pe e torrin da vrec'h dit !
— Drouk eo, emezon, ha dalc'hmat e vez ur gontell vras digor en e gichen.
— War-raok, eme an den dall, gant ur vouezh gros ha divalav. Ma c'has betek
ar c'habiten, ha huch dezhañ Setu amañ ur mignon, Bill ! pe e .... "
-
PENNAD C'HWEC'H
AR MERK DU
Ken spontet e voen ma sentis outañ. Pa welas ar c'habiten an estrañjour e
klaskas sevel, met re wan e oa.
"Azez e-lec'h ma 'z out !", a c'hourc'hemennas dezhañ an den dall.
"An aferioù eo an aferioù. Ma faotr, krog en e vrec'h ha laka e zorn e-kichen ma
hini." An den dall a dremenas un dra bennak e dorn ar c'habiten hag e redas
ken buan all er-maez eus an ti.
Ar c'hozh paotr kozh a selle ouzh e zorn. "Dek eur, emezañ, c'hwec'h eurvezh
a chom ganin c'hoazh." Lammat a reas en e sav, met diouzhtu e kouezhas
marv-mik war al leurenn.
Ma mamm ha me a yeas d'ar gêriadenn da glask sikour. Met an dud o doa
kement a aon diouzh ar c'habiten Flint ma ne gredent ket tostaat. Un den war
varc'h a gasas keloù d'an Doktor Livesey.
Distreiñ a rejomp d'an ostaleri. Ma mamm a felle dezhi kaout an arc'hant a zlee
dezhi ar c'habiten kozh. Ne oa bet den en ti er c'heit-se. Chomet e oa ar
c'habiten gourvezet war ar memes lec'h. En e gichen e kavis un tamm paper
duet war un tu, ar merk du. Ha setu ar gerioù a oa skrivet warnañ : "Betek dek
eur ez peus c'hoazh."
-
PENNAD SEIZH
AL LAERON-VOR
Alc'hwez e gased1 a zouge dindan e roched. Troc'hañ a ris al las ha pignat d'ar
gambr. C'hwezh ar butun hag ar goudroñs a oa gant e gased. Leun e oa a zilhad
hag a draoù iskis dastumet gantañ e-kerzh e veajoù. Dindan ur gozh vantell e
tizolois ur yalc'had aour hag ur bakadenn paperoù pleget en ur sac'h danvez
eouliet.
" Diskouez a rin da vandenn laeron-vor ar c'habiten Flint ez on ur plac'h onest,
ne gemerin ket ur gwenneg a re ", eme ma mamm. A-boan ma oa aet hanter he
c'hont ganti pa glevjomp trouz ur vazh war an hent hag ur c'hwitelladenn war ar
run2. Ma mamm gant hec'h arc'hant kontet ha me gant ma fakadenn baperoù a
nijas kuit eus an ti.
Dinerzhet-holl e kouezhas ma mamm hep dale. Sachañ a ris anezhi dindan ar
pont bihan a oa e-kichen hon ti ha mont da guzh a-dreñv ur bod evit sellout ouzh
bandenn Flint o tremen. Seizh pe eizh a oa anezho.
An hini kentañ a zouge al letern hag an hini dall a gerzhe etre an daou war-
lerc'h. "Taolit an nor e-barzh." emezañ. Unan a huchas "Digor eo !" hag unan
all "Bill a zo marv !"
"Furchit anezhañ, eme an den dall, ha diskennit ar c'hased d'an traoñ."
Kriadennoù a glevis neuze. Unan eus ar baotred a zigoras prenestr kambr ar
c'habiten evit astenn e benn er-maez.
" Pïou ! emezañ d'an den dall. Unan bennak en deus goullonderet ar c'hased,
met krog on en arc'hant !
— Chaous gant an arc'hant, eme Pïou, pelec'h emañ skrid ar c'habiten Flint ?
E-diabarzh ar c'hased pe war an hini marv ?
— N'eus skrid ebet nag er c'hased, na war Bill, eme unan bennak.
— Aet eo gant ar paotrig, gant mab an ti ! Ret eo dimp lakaat an dorn war dud
an ostaleri ! "
1 ur c'hased = ur voest vihan e koad 2 ur run = ur menez bihan, un dosenn
-
PENNAD EIZH
E KASTELL AN ADMIRAL
Furchal a raent dre an ti en ur ziskar an norioù hag en ur zispenn an arrebeuri.
Ur c'hwitelladenn a zeuas adarre eus lein an dosenn, ha goude unan all c'hoazh.
Kement-se a oa sur-mat ur sin evit lavarout diwall.
Al lodenn vrasañ eus al laeron a glaske an tu da vont kuit gant ar madoù o doa
dastumet. Met ne felle ket d'o rener, an den dall Pïou, ha skeiñ a rae warno gant
e vazh ken fuloret e oa.
An tabut-se a saveteas dimp hor buhez. Al laeron-vor a gollas amzer. Dija e
klevemp kezeg o taoulammat war an dorgenn1. Neuze e tarzhas un tenn
pistolenn adarre. Un sin all e oa c'hoazh : an hailhoned-se a dec'has kuit prim-
ha-prim. Ar paour-kaezh Pïou a chomas en e unan penn.
Mont a rae war-raok en ur skeiñ war an hent gant e vazh ha gervel e vignoned
gant ur vouezh truezus. Met ar c'hezeg a oa dija warnañ. Pïou a voe diskaret
ganto, hag e ruilhas dindan o zreid.
An den a oa bet aet war varc'h da di an Doktor Livesey en doa kavet war e hent
Paotred an Tailhoù. Displeget en doa dezho e peseurt riskl en em gavemp ma
mamm ha me. Diouzhtu e oant deuet betek ostaleri an Admiral Benbow. D'ar
rener e lavaris em boa kavet ur bakadenn baperioù e koufr ar martolod kozh.
Ret e oa o fiziout en Doktor Livesey. Ar rener am c'hemeras gantañ war e varc'h.
An Doktor hag Aotrou ar C'hastell a oa azezet o-daou en-dro d'ar siminal bras
pep a gornad butun ganto en o genoù. An Aotrou a oa bras, ledan e zivskoaz.
Ur penn mat en doa. Buanek2 e oa met ne oa ket drouk. Ar rener a gontas an
istor hag a zistroas d'e labour. Ma-unan e chomis neuze gant an daou zen.
1 an dorgenn = an duchenn, ar run 2 Buanek : prim da fuloriñ
-
PENNAD NAV
SEKREDOÙ AR C'HABITEN FLINT
"— Klevet hoc'h eus bet komz eus ar c'habiten Flint ? eme an doktor d'an Aotrou
Trelawney.
— Piv n'en deus ket ? Bez' e oa an hini droukañ eus an holl laeron-vor.
— Ha bez' en doa kalz a arc'hant ?
— Arc'hant ? Ya, evel-just. Ar seurt tud ne soñjont nemet en dra-se.
— Lakaomp e vefe er bakadenn-mañ ur gartenn da ziskouez pelec'h eo bet
kuzhet gante e deñzor. Neuze, avat, e feurmin-me ul lestr e Bristol evit mont da
glask an teñzor. C'hwi ha Jim a zeuio ganin.
— Mat, eme an Doktor, digoromp eta ar bakadenn degaset gant Jim.
An Doktor a droc'has ar fiselennoù gant e sizailhoù-medisin. En diabarzh e
kavas ur c'haier hag un tamm pakadenn serret gant koar1.
Er c'haier en doa skrivet Flint diwar-benn al listri hag ar c'hêrioù preizhet2 gantañ
ha diwar-benn an dud lazhet gantañ.
Met kalz talvoudusoc'h a oa er bakadennig. Kartenn un enezenn a gouezhas
diouti. Displeget e oa warni peseurt hent a dle ur c'habiten heuliañ evit mont
betek enni.
War-dro 13 kilometrad a hed hag 8 a dreuz a oa dezhi. Er c'hreiz e oa ur menez
anvet "Lunedenn ar Spier". Gwelet a raed c'hoazh teir c'hroaz treset gant liv ruz.
Div en hanternoz hag unan er mervent gant ar gerioù-mañ : "Amañ emañ lodenn
vrasañ an teñzor".
E traoñ ar bajenn e oa bet treset ur wezenn vras gant ar memes dorn. Berviñ
gant ar joa3 a rae an Doktor hag an Aotrou Trelawney.
1 koar = danvez teuzus dre an tan, implijet a-wechoù evit diskouez n'eus ket bet klasket digoriñ. 2 preizhet : laeret kalz traoù ennañ/enni 3 berviñ gant ar joa = bezañ tri-mil laouen
-
— Livesey, eme an Aotrou, arc'hoazh e tiskennin da gêr Vristol. A-benn teir
sizhun, pe kentoc'h a-benn 13 devezh, e vo ganeomp gwellañ lestr ha gwellañ
martoloded Bro-Saoz. Jim a vo mevel ha c'hwi a vo medisin. Amiral ez on. Tri
eus ma mevelien a zeuio ganimp. Ur veaj vat a raimp hag aes-kenañ e vo
dizoloet lec'h an teñzor. Arc'hant e-leizh hor bo neuze evit ar peurrest eus hor
buhez.
— Mont a rin ganeoc'h, eme an Doktor, ha Jim ivez. Aon am eus hepken diouzh
un den.
— Diouzh piv 'ta, Ma Doue ?
— Diouzhoc'h-c'hwi ! N'ouzoc'h ket serriñ ho kenoù na tevel !
— Livesey, eme an Aotrou war un ton sirius, chom a rin mut evel ur c'hleuz !
Da vezañ kendalc'het evit gouzout penaos e troio an traoù...